es eu en

webgunean bilatu

Heziketa baliabideak

Konta ezazu ondo

Heziketa Gaitasunak

Hezkuntzako Lege Organikoak oinarrizko gaitasunak terminoa sartu du eskola kurrikuluan. Kontzeptu berri honek irakaskuntza metodoen erabateko birformulazioa dakar berekin. Oinarrizko gaitasunen definizioa hauxe da: derrigorrezko hezkuntza amaitutakoan ikaslegoak garatuta izan behar lituzkeen trebetasunak eta estrategiak, errealizazio pertsonala lortu ahal izateko, hiritartasun aktiboan jarduteko, heldutasunean sartzeko eta bizitza osoan zehar etengabeko ikaskuntza garatzeko gai izan dadin.

Hala, hezkuntzako derrigorrezko etapa desberdinentako arlo edo ikasgaien kurrikulua, oinarrizko zortzi gaitasun – guk bederatzigarren bat gehitzen diogu, gaitasun espirituala- lortzen eta garatzen laguntzeko diseinatu da:

1. Hizkuntza komunikazioan gaitasuna
2. Matematika gaitasuna
3. Zientzia gaitasuna
4. Informazioaren tratamendua eta gaitasun digitala
5. Gaitasun sozial eta hiritarra
6. Gaitasun kultural eta artistikoa
7. Ikasten ikasteko gaitasuna
8. Autonomia eta iniziatiba pertsonala
9. Gaitasun espirituala

ALBOAN-en, solidaritatea eta garapenerako hezkuntza lantzeko hezkuntza materiala garatzen aritu gara 10 urte baino gehiagoan. Gure helburua, hiritargo arduratsu baten hezkuntzan aurrera egitea da, hiritargo konprometitua eta pertsonak eta kulturak bere barne hartuko dituena lortzea. Horretarako, hezkuntza, komunikazio eta parte-hartze sozialerako proposamenak eskaintzen ditugu, gailentzen den eredu kulturalari alternatibak aurkitu asmoz.

Material hauek, errealitatearekin konprometiturik dagoen hiritargo kulturanitzaren formakuntzarako, trebakuntzarako eta jardunerako erabilpen handiko baliabide gisa konfiguratu dira. Erraz egoki daitezke gaitasunen bidez irakatsi-ikasteko prozesuen proposamen berrira.

Gaitasun bidezko lana errazteko, gure fitxak egokitu egin ditugu, eta fitxa bakoitzean proposamen bat ezarri dugu, modurik argienean lantzen diren 3 gaitasunekin.

Gaitasunak ebaluatu ahal izateko eta erreferentzia gisa erabili ahal izateko ikasgelan atazak eta aktibitate didaktikoak programatzeko, interesgarria eta ezinbestekoa deritzogu gaitasunak azpigaitasun-etan eta adierazleetan banatzeari.

Azpigaitasuna lehen zehaztasun maila generiko bat da arlo guztietarako eta ondoren hainbat adierazletan zehazten doa, maila bakoitzaren arabera. (Ikus hezkuntza gaitasunei buruzko esparru-dokumentua)

Adierazleak, ikasleak gaitasuna menperatzen duela erakusteko gara ditzakeen eta beha daitezkeen atazak dira eta horregatik ebaluaziorako adierazleak dira.

© 2011 ALBOAN - Padre Lojendio, 2, 2º 48008 – Bilbao - Teléfono: 944 151 135 CC Licencia de Creative Commons